कात्तिक । नेपालमा बढ्दो भारतीय हस्तक्षेपलाई लिएर चीनले चिन्ता व्यक्त गरेको छ ।

नेपाललाई अर्को सिक्किम बनाउने खतरा 
काठमाडौं, १५ कात्तिक । नेपालमा बढ्दो भारतीय हस्तक्षेपलाई लिएर चीनले चिन्ता व्यक्त गरेको छ ।
नाङ्गो हस्तक्षेप गर्न नपाउँदा नाकाबन्दी गरेर नेपालमा संकट निम्त्याएको भारतको नियतमा चीनले चिन्ता व्यक्त गरेको हो । नेपाल मामिला हेर्ने चीनका विज्ञहरूले ‘भारतीय हस्तक्षेप धेरै गम्भीर रहेको’ बताएका हुन् ।
बेइजिङका वरिष्ठ नेपाल विज्ञ प्रोफेसर वाङ होङवेले भारतको ब्रिटिशकालीन रणनीतिले नेपाललाई अर्को सिक्किम बनाउने खतरा रहेको बताउनुभएको छ । ‘भारतले ब्रिटिशकालिन दक्षिण एसिया रणनीतिलाई जन्मजात नै निरन्तरता दिएको छ र हिमालय दक्षिणको भूभागलाई आफ्नो सैन्य क्षेत्र मानेको छ’ प्रोफेसर वाङ होङवेले भन्नुभयो- ‘नेपालमा भारतको हस्तक्षेप धेरै गम्भिर छ, भारतका केही सेवानिवृत्त अधिकारीहरूले त नेपाल दोस्रो सिक्किम बन्नुपर्छ भनेका छन् ।’

संविधानमा मधेशको मागलाई उचित सम्बोधन गर्न दबाब दिने क्रममा भारतले नेपालमाथि अघोषित नाकाबन्दी गरेसँगै बेइजिङमा नेपालको विषयलाई लिएर सरकारी र विज्ञ तहमा निरन्तर छलफल भइरहेको छ ।
पछिल्लो समय मधेलाई छुट्टयाउने अभिव्यक्ति आउन थालेपछि चीनले पत्रकार सम्मेलनै गरेर ‘राष्ट्रिय स्वतन्त्रता, सार्वभौमिकता तथा भौगोलिक अखण्डता रक्षाका लागि नेपालले गरेका प्रयासहरूमा आफ्नो साथ रहने’ प्रतिवद्धता जनाएको थियो ।

अघोषित नाकाबन्दीको बहानामा भारतले नेपाललाई अर्काे सिक्किम बनाउन सक्ने चिन्ता जनाउँदै चीनले सतर्कता अपनाउन नेपाली अधिकारीहरुलाई आग्रह समेत गरेको छ ।
बेइजिङ इन्टरनेशनल युनिभर्सिटिको इण्डिया रिसर्च सेन्टरले गत साता आयोजना गरेको नेपालसम्बन्धी पहिलो सम्मेलनमा प्रोफेसर वाङ लगायतका विज्ञ र सरकारी अधिकारीहरूले नेपाल–भारत पछिल्लो सम्बन्ध र भारतको नियतका विषयमा गम्भीर छलफल गरेका थिए ।
– दैनिक नेपाल