युनाइटेडले सिएसकेए मस्कोलाई १–० ले हरायो

कात्तिक १८ – च्याम्पियन्स लिग फुटबल अन्तर्गत मंगलबार राति भएको खेलमा म्यानचेस्टर युनाइटेड विजयी भएको छ । समुह बी मा रहेको म्यानचेस्टर युनाइटेडले सिएसकेए मस्कोलाई १–० ले हरायो । म्यानचेस्टर युनाइटेडको जितमा ७९ औं मिनेटमा वायने रुनीले गरेको गोल नै निर्णायक बन्यो । समुह बीको शीर्ष स्थानमा रहेको म्यानचेस्टर युनाइटेडको चार खेलबाट सात अंक छ । चार खेलबाट चार अंक नै जोडेको सिएसकेए समुहको पुछारमा छ । समुह बी अन्तर्गतकै खेलमा पिएसभीले उल्फबर्गलाई २–० ले हराएको छ । चार खेलबाट समान ६ अंक जोडेको पिएसभी र उल्फबर्ग दोस्रो र तेस्रो स्थानमा छन् । मंगलबार राति नै भएको समुह सी अन्तर्गतको खेलमा बेन्फिकाले गालाटासारेलाई २–१ ले हरायो । चार खेलबाट ९ अंक जोडेको बेन्फिका समुह सीको शीर्ष स्थानमा छ भने चार खेलबाट चार अंक नै जोडेको गालाटासारे तेस्रो स्थानमा छ । समुह सी अन्तर्गतकै खेलमा एथ्लेटिको मड्रिड र एफसी आस्टनले गोल रहित बराबरी खेल्दै अंक बाँडेका छन् । चार खेलबाट सात अंक जोडेको एथ्लेटिको मड्रिड दोस्रो तथा चार खेलबाट दुई अंक मात्रै जोडेको आस्टन समुहको पुछारमा छ ।